TIPS atu prepara respostas ba Perguntas iha Entrevista Bolsa-Estudu

Le tiha informasaun iha hau nia post antes kona ba Lista pergunta ne’ebé bai-bain mosu iha entrevista bolsa estudu, (karik seidauk le Lista pergunta ba entrevista, bele click iha ne'e) maluk balu inbox hau oinsa atu prepara respostas ba perguntas prinsipais sira hanesan,

1. Why do you want to study on this specific course?
2. What is your motivation to study this subject?
3. What will this course provide you?
4. Can you verify any major discipline/subject that has become the highlight on your chosen field? What are the subjects that you think you will study?

Hau sei la hakerek hotu respostas ba perguntas ne’e ida-ida maibe, hanesan tips jeral ida, presiza halo peskiza uitoan iha internet. Ema hanoin dehan la presiza, maibe tuir hau nia experiensia rasik, ida ne’e ajuda tebes hau.

Oinsa atu prepara respostas.

TIPS:

1.      Tur refleta saida mak ita halo ona, ne’ebé iha relasaun ho kursu ne’ebé ita atu foti ba. Bele experiensia serbisu, ou estudu anterior. Karik seidauk iha experiensia, bele liga mos situasaun rai-laran agora, saida mak ita nia kursu ne’e sei hatan ba.

Ezemplu, karik atu foti Finansa ka accounting, it abele liga ho programa PNDS (Programa Nasional Dezenvolvimentu Suku) nebe agora lao dadaun. Programa ne’e sei presiza kontabilista barak iha aban bain rua atu hametin jestaun finanseiru iha rai doben Timor no hamenus korupsaun. Agora mos governu koalia man-manas hela deskonsentrasaun, desentralizasaun, estabelesimentu munisipiu, nsst. Ita bele kreativu liu tan, duke hau nia experiensia simples ida ne’e.

2.      MAIS IMPORTANTE. Loke website universidade nian mais ou menus tolu. Barak liu tan, diak liu tan. Por ezemplu, loke Monash university, University of Melbourne, RMIT, University of New South Wales, ka Victoria University sira nia website. Kada website universidade nian ne’e iha ‘search’ tool nebe ita bele uza hodi buka faculdade ka kursu ne’ebé ita hakarak hili.

Hanesan ezemplu, hau koko monash university nian, hodi search bachelor of accounting. Link nebe hau hetan mak iha okos ne’e. http://www.monash.edu.au/study/coursefinder/course/0169/study-area.html?courseview=domestic

Iha neba hakerek, ‘Accounting is the systematic recording, reporting, and analysis of financial transactions .. Accounting allows a company to analyse its financial performance, and report important statistics such as profit and loss to managers and shareholders. La’o para deit ho universidade ida, buka mos iha universidade seluk.

Ho ida ne’e ita hatene accounting ne ita atu estuda saida deit la’os deit sura osan ka halo debit credit hanesan ema jeral hatene.  Dala ida tan, labele terpaku ho universidade ida deit.

3.      Sei kontinua ho search website universidade nian, informasaun barak mak iha neba inklui mata kuliah saida-saida deit mak universidade oferese, ‘career opportunity” saida-saida deit mak iha, nsst.

Hanesan ezemplu, iha hau nia search iha website Monash nian kona ba accounting, hau ba iha course outline, hau hetan kursu nebe sira sei oferese mak introduction to accounting and finance, financial accounting, Auditing and assurance, Corporate finance, nsst.

Ida ne’e ajuda ona ita atu hatan ba pergunta hirak hanesan, “what courses / subjects do you think you will study?” “Can you verify any major discipline/subject that has become the highlight on your chosen field?”

4.      Husi resultadu search hirak ne’e copy tau hamutuk iha word, hodi bele edit no parafraze ba linguajen simples nebe ita bele kumprende. Kategoriza hanesan rezumu jeral ida, objetivu kursu ketak, kursu ka mata kuliah saida-saida deit mak sei foti, no informaasun seluk-seluk tan ketak-ketak.

Se ita search ho diak, ita sei hetan informasaun lubuk ida.. maibe ita edit no hakerek hotu iha word parese tahan ida ka rua deit..

Ho tips iha leten ne’e hau sente ita iha ona informasaun lubuk ida hanesan preparasaun ba entrevista.

TIPS atu hatan

Tips atu hatan ba pergunta sira hanesan, “why do you want to pursue your course of choice?” ka iha tetun dehan tamba saida mak ita hakarak foti kursu ida ne’e? Ezemplu, tamba saida mak ita hakarak estuda kursu Accounting.

Hodi bele suksesu ita bele hatan ba pergunta ne’e, diak liu ita liga ba buat tolu hanesan iha okos ne’e.

1.  Liga experiensia pessoal, serbisu, eskola, ho ka situasaun rai laran.
2. Liga ho saida mak universidade oferese (informasaun ne’e ita hetan husi website hanesan hau temi iha leten)
3. Liga ho saida mak ita sei halo wainhira fila fali mai Timor

Ezemplu:

LIGA HO EXP PESOAL:

Hau hakarak foti accounting, tamba durante ne’e hau servisu iha XXX hanesan staff finansa. Ou tamba hau nia hare agora ne’e governu halao hela programa PNDS. Ida nee sei presiza kontabilista lubuk ida aban bain rua hodi hametin sistema finansa iha rai Timor. Agora mos, governu foin lansa ho programa Dekonsentrasaun hodi prepara ba desentralizasaun no estabelesimentu musipiu. Se aban bain rua, desentralizasaun ne la’o duni, timor sei presiza ema iha area finansa ho kontabilidade barak atu bele hametin sistema finanseiru iha nivel distritu. Se lae, desentralizasaun bele fo mos oportunidade ba ema atu halo korupsaun (ne hanesan ezemplu deit).  Tamba ne’e mak hau hakarak atu foti kursu kontabilidade.

LIGA HO SAIDA MAK UNIVERSIDADE OFERESE

I hau hare katak wainhira hau ba eskola foti kursu ida ne’e hau sei estuda kona ba... (foti ideia ruma husi universidade nian nebe ita hetan husi ita nia peskiza). Kursu ne’e sei fo abilidade ka skill ...... kursu ne’e sei prepara hau atu hau bele.... wainhira remata hau sei hatene kona ba........

LIGA HO SAIDA MAK SEI HALO WAINHIRA FILA MAI

Ho abilidade no kunesimentu nebe universidade sira fo ne’e wainhira remata hau sei serbisu iha xxxx... hodi kontribui ba dezenvolvimentu Timor liu husi.... (dalan saida?) labele temi deit dehan, ‘hau sei kontribui fali ba Timor. Ne ema hotu bele hatan. ‘HO DALAN SAIDA,? Ida ne mak ema entrevista nain sira hakarak hatene.

Prontu, ne’e hanesan ezemplu kiik-oan ida, iha dalan oi-oin atu prepara-an didiak ba entrevista, maibé hau fiar TIPS hirak ne’e mos sei ajuda, atu ita la ba ho liman mamuk iha entrevista.

Espera katak ida ne’e ajuda ona maluk barak iha Timor. Hein imi nia sujestaun no komentariu sira.

Hakuak boot,

barrosbill@gmail.com